ဒါရိုက်တာ၊ စာရေးဆရာ
မောင်ဝဏ္ဏ (၆၅ နှစ်)ဟာဇန်နဝါရီ ၁၁ ရက် မနက် ၄ နာရီ ၂၀ က အဆုတ်ကင်ဆာ ရောဂါနဲ့ ရန်ကုန်မြို့
သင်္ကန်းကျွန်း သာဓုခြံ နေအိမ်မှာ ကွယ်လွန်သွားပါတယ်။
ဆရာမောင်ဝဏ္ဏဟာ
ကွယ်လွန်သူ စာရေးဆရာ ဒါရိုက်တာ သာဓုနဲ့ မိခင် ဒေါ်ခင်ညို တို့ရဲ့ သားကြီးဖြစ်ပြီး ၁၉၄၇ခုနှစ်
ဇန်နဝါရီလ ၁၉ ရက်နေ့မှာ မွေးဖွားခဲ့ပါတယ်။ ၁၉၆၉ခုနှစ်မှာ သိုင်းသမား ရုပ်ရှင် ဇာတ်ညွန်းကို
ရေးသားခဲ့ပြီး ၁၉၇၀ မှာ ကတ္တီပါဖိနပ်စီး ရွှေထီးဆောင်း ရုပ်ရှင်ကားကို ပထမဆုံး ရိုက်ကူးကာ
ဒါရိုက်တာအကယ်ဒမီဆုကို ရရှိပါတယ်။ ၁၉၉၀ မှာ ခုနှစ်စဉ်အလွမ်း ရုပ်ရှင်နဲ့ ဒုတိယအကြိမ်
ဒါရိုက်တာ အကယ်ဒမီဆုကို ရရှိခဲ့ပါတယ်။ (ညီဖြစ်သူ သုမောင်လည်း မင်းသားဆု ရရှိခဲ့သလို
အဲဒီဇာတ်ကား ဇာတ်ညွှန်းနဲ့ ၀တ္တုရေးတဲ့ ညီငယ် မင်းလူကတော့ “ချိုကုပ်ဒူးကြီးကျောပြောင်”
ဆိုတဲ့ စာသားမျိုးပါဝင်တဲ့ ကဗျာကို ရေးသားလို့ အထိန်းသိမ်းခံနေရချိန်ဖြစ်ပါတယ်။)
ဆရာမောင်ဝဏ္ဏဟာ
ဝတ္ထုတို ဝတ္ထုရှည်နဲ့ ပန်းတွေနဲ့ဝေ ၊ ချစ်တဲ့သူငယ်လေ ၊ အိပ်မက်စိမ်း၊ အစရှိတဲ့ လုံးချင်းဝတ္ထုပေါင်း
အုပ် ၂ဝ လောက် ရေးသားခဲ့ပါတယ်။ညီဖြစ်သူ စာရေးဆရာ၊ အဆိုတော် သရုပ်ဆောင် သုမောင်ဟာလည်း
လွန်ခဲ့တဲ့မေလက ကွယ်လွန်ခဲ့ပါတယ်။
သဘာဝကျပြီး အနုပညာ
မှော်အောင်ခဲ့တဲ့ သာဓုရဲ့ သဘာဝအုပ်စုတွေအကြောင်း တစိတ်တပိုင်း ပုံရိပ်ဖြစ်တဲ့ သုမောင်ရဲ့
(သဘာဝအုပ်စု) ဆိုတဲ့ စာစုလေးကို ပြန်လည်ဖေါ်ပြရင်း ဆရာ သာဓု၊ ဆရာမောင်ဝဏ္ဏ၊ ဆရာသုမောင်တို့
ကို ဂါရ၀ ပြုအပ်ပါတယ်။ ဆရာတို့ ကောင်းရာသုဂတိလားပါစေ။
ရွှေမော်ကွန်း
အယ်ဒီတာအဖွဲ့
သဘာဝအုပ်စု
(၁)
အထက်ပါ အမည်မှာ
ကျွန်တော့်ဖခင်ကြီး၏ရုပ်ရှင်ကုမ္ပဏီအမည် ဖြစ်ပါသည်။
မူလကုမ္ပဏီ ထူထောင်ကာစကမူ
' သာဓုရုပ်ရှင် ' ဟူ၍ အမည်ပညတ် ခဲ့သော်လည်း နောင် ကျွန်တော့်အကို မောင်ဝဏ္ဏ ဒါရိုက်တာလုပ်၊
နောက် ကျွန်တော် ဒါရိုက်တာလုပ် စသဖြင့် ဖြစ်လာသောအခါ ခေတ်အလျောက် ဓာတ်ပုံရိုက်နည်း
ရိုက်ချက်များ ကွာခြားလာသဖြင့် ...
'' မင်းတို့လုပ်တာ
ငါ့မူပျောက်တယ်။ ဒီတော့ ကုမ္ပဏီ နာမည်ကို ငါ့
နာမည် မထည့်တော့ဘူး
ပြောင်းပစ်မယ်။ အေး .... တစ်ခုရှိတာက မင်း
တို့လည်း သဘာဝကျတဲ့
ဇာတ်လမ်း ဇာတ်ကွက်တွေ ဖန်တီးတဲ့နေရာမှာ
တော့ ငါနဲ့ တူတဲ့အတွက်
... ''
ဟူသော အကြောင်းပြချက်ဖြင့်
...
သာဓုရုပ်ရှင်မှ
သဘာဝအုပ်စု ဟူ၍ ဖြစ်သွားရပါသတည်း။
ကျွန်တော်ပြောလိုသည်မှာ
ရုပ်ရှင်ကုမ္ပဏီ နာမည်ကိစ္စ မဟုတ်ပါ။ သဘာဝကျသော ကျွန်တော်တို့ မိသားစုအကြောင်းထဲမှ တစ်စိတ်တစ်ဒေသဖြစ်သော
ကျွန်တော်တို့ ညီအကိုလေးယောက်၏ စရိုက်သဘာဝ အကြောင်းကလေးမျှသာ ဖြစ်ပါသည်။
ထို့ထက်ကား လူတစ်ယောက်၏
ဘဝတစ်ခုလုံးနှင့် သက်ဆိုင်သော စရိုက်သဘာဝမဟုတ်ဘဲ အလွန်သေးဖွဲသော စရိုက်သဘာဝလေးတစ်ခု
အကြောင်းမျှသာ ...
သို့ရာတွင် ထိုသဘာဝ
အသေးစားကလေးသည် လူတစ်ယောက်၏ စိတ်နေသဘောထား၊ အမူအကျင့်စရိုက်ကို ချဲ့လျှင် ချဲ့သလို
ဖော်ကျူးနေပြန်ပါသည်။
ကျွန်တော် ပြောပြပါမည်။
ထူးဆန်းသည်ဟု
ပြောလျှင်လည်း ရတန်သလောက် ရပါသည်။
ကျွန်တော်တို့
ညီအကို လေးယောက်စလုံးသည် ခါးပိုက်နှိုက် တစ်ကြိမ်စီခံရခြင်းပင် ဖြစ်ပါသည်။ ထူးဆန်းသည်ဟု
ပြောရခြင်းမှာ ' ဖောင်တိန် ' များချည်း ဖြစ်နေသောကြောင့်ပင်။
ထိုစဉ်က ( ၁၉၆၉ခန့်
) ကျွန်တော့်အကိုက တက္ကသိုလ် နောက်ဆုံးနှစ်ကျောင်းသား၊ ဒဿနိက ဗေဒပညာရပ် သင်ယူနေသူ။ ကျွန်တော်ကစက်မှုလက်မှု
အထက်တန်းကျောင်း နောက်ဆုံးနှစ်ကျောင်းသား။ အငယ်နှစ်ကောင် မောင်ရူပ၊ မောင်ဉာဏ်ပေါ်တို့က
ရှစ်တန်းခေါ် အဋ္ဌမတန်း။
ကျွန်တော်တို့
အငယ်သုံးယောက်စလုံးသည် အစ်ကိုကြီး မောင်ဝဏ္ဏကို အားကိုးကြသည်။ ထိုစဉ်က သူသည် ကျောင်းတစ်ဖက်တက်ရင်း
' ကတ္တီပါဖိနပ်စီး ရွှေထီးဆောင်း ' ဇာတ်ကားကို တစ်ဖက်က ရိုက်ကူး
နေသည်။
ဉာဏ်ကောင်းသည်။
အလုပ်လုပ်သည်။ သည်းညည်းခံသည်။ ညှာတာသည်။ မိဘကို လုပ်ကျွေးရင်း ကျွန်တော်တို့ကိုလည်း
အသိပညာ တိုးတက်အောင် လမ်းပြသည်။ သူသည် အဖေပြီးလျှင် အိမ်မှာ အားအကိုးရဆုံး ဖြစ်သည်။
ထို့ကြောင့် အစ်ကိုကြီး၏
အကျင့်များ ကျွန်တော်တို့ထံသို့ အလိုလို ပူးကပ်လာကြတော့သည်။
အထူးသဖြင့်မူ
ဘတ်စ်ကားတိုးစီးရခြင်း၌ အကြောင်းမဲ့ ဝါသနာထုံခြင်းပင်။ ထိုစဉ်က ကျွန်တော့်ဖခင်ကြီးသည်
ငွေကြေးချမ်းသာသူ တစ်ယောက်အဖြစ် သတ်မှတ်နိုင်လောက်ပါသည်။ မော်တော်ကား သုံးစီး ပိုင်ပါသည်။
သို့သော် ကျွန်တော်တို့သည် မည်သည့်ဒဿနမှန်း မသိသော ဘတ်စ်ကားစီးချင်ခြင်းတပ်မှုကို သံယောင်
လိုက်နေခဲ့ကြပါသည်။ အဖေ့ကားများကို သိပ်မစီးဖြစ်။
ထိုစဉ်က ဘတ်စ်ကားများသည် ယခုလောက် မကျပ်သော်လည်း မတ်တတ်ကတော့ များသောအားဖြင့် ရပ်ရပါသည်။
အထူးသဖြင့် ကျောင်းဆင်းချိန်၊ ရုံးဆင်းချိန်များတွင် တိုးဝှေ့တက်ရခြင်း၊ အလယ်လူသွားလမ်းမှာပင်
ရုပ်ရှင်ကားကောင်း တစ်ကားကြည့်ရန် တန်းစီရခြင်းမျိုးများ ရှိတတ်ပါသည်။
ပြီးတော့ အဲသည်အချိန်က
ခါးပိုက်နှိုက်များ အလွန်ခေတ်ထ ခဲ့ကြပါသည်။ အထူးသဖြင့် မျက်မှန်ကို တပ်ထားလျှက်က ဖြုတ်၍ဆင်းပြေးသော
ခါးပိုက်နှိုက်များ စူပါစတား ဖြစ်နေချိန် ဖြစ်သည်ကို ကျွန်တော် မှတ်မိနေသေးသည်။ အကြောင်းမှာ
ထိုစဉ်က ကျွန်တော် မျက်မှန်တပ်ရသောကြောင့် ဖြစ်ပါသည်။
ကိုင်း .... ဖောင်တိန်ကိစ္စ
ဆက်ကြရအောင်ပါ။ ကျွန်တော်တို့ လေးယောက်စလုံး ဖောင်တိန်အကိုင် ဝါသနာကြီးကြပါသည်။ ကျောင်းသားတွေမို့ရယ်
မဟုတ်ပါ။ စာရေးဆရာ ဖြစ်ချင်သောဗီဇက ကျွန်တော်၊ ကိုကိုမောင်ဝဏ္ဏ၊ မောင်ဉာဏ်ပေါ်နှင့် စာရင်းအင်းလုပ်တာ
ဝါသနာပါသော မောင်ရူပတို့တွင် ပါလာသောကြောင့် ဖြစ်ပါသည်။
ထို့ကြောင့် ကျွန်တော်တို့သည်
ဘယ်သွားသွား ဘယ်လာလာ ဖောင်တိန်ကို အိပ်ကပ်ထဲမှာ အမြဲချိတ်ထားကြလေသည်။ ပြီးတော့ စာရေးဆရာဖြစ်ချင်သူများပီပီ
ခရီးယာယီကလည်း အလွန်များသည်။ အချိန်အားရလျှင် ရသလို အကြောင်းရှိရှိ မရှိရှိ မြို့ထဲသို့
ထွက်ကြသည်။
ဖေဖေ့ကဲ့သို့ပင်
လွယ်အိပ် တစ်ယောက်တစ်လုံးလွယ်၍ စာရေးဆရာများပေါများသော ၃၃လမ်းလို နေရာမျိုးသို့ လည်းကောင်း၊
ပုဂံစာအုပ်တိုက် ( ထိုစဉ်က စာရေးဆရာများ စတည်းချရာ ) သို့လည်းကောင်း၊ မဂ္ဂဇင်းတိုက်များသို့လည်းကောင်း
... ။
(၂)
ဤသို့အားဖြင့်
ကျွန်တော်တို့ လေးယောက်စလုံး ခါးပိုက်အနှိုက်ခံကြရသည်တွင် ကြီးစဉ်ငယ်လိုက် အနှိုက်ခံရပုံကို
ကျွန်တော် မပြောပါ။ စိတ်ဝင်စားဖွယ်ကောင်းသော စရိုက်သဘာဝကို တတ်နိုင်သမျှ နောက်
ပိုင်းထား၍ ပြောလိုပါသည်။
ထို့ကြောင့် သိပ်မထူးခြားလှသော ကျွန်တော့် အဖြစ်ကို စတင်ပြောပြပါမည်။
တစ်နေ့တွင် မော်လမြိုင်မြို့မှ
ကျွန်တော့်ဘကြီး ဆရာဝန် ရန်ကုန်သို့ဆေးအဝယ် ရောက်လာသည်။ ထိုစဉ်က ရန်ကုန်မှာက ဆေးပိုပေါပါသည်။
ပြည်သူဆိုင်မှ ဆေးကို ဈေးသက်သက်သာသာဖြင့် ရနိုင်၏။
ဘကြီးက ကျွန်တော့်ကို
မြို့ထဲမှ ပြည်သူ့ဆေးဆိုင် တစ်ဆိုင်သို့ ဆေးအဝယ်လွှတ်၏။ ဝယ်ခဲ့သော ထိုးဆေး၊ သောက်ဆေး၊
လိမ်းဆေးများစုံလင်သဖြင့် စာအုပ်စာတမ်းများဖြင့် ပြည့်နှက်နေသော ကျွန်တော့် လွယ်အိပ်ထဲ
ထည့်၍မဖြစ်။ ကွဲမည်ပြုမည် စိုးရ၏။ ထို့ကြောင့် လက်တစ်ဖက်ဖြင့်ပင် ဆေးအိပ်ထုပ်ကို ကိုင်ရ၏။
ဘတ်စ်ကား ကျပ်သဖြင့်
မတ်တတ်ရပ် စီးရသောကြောင့် ကျွန်တော့် လက်တစ်ဖက်က ခေါင်မိုး လက်တန်းကို ကိုင်ထားရ၏။
ထိုအချိန်တွင် ကျွန်တော် သတိကြီးစွာ ထားနေရသည်မှာ ဆေးအိပ်ထဲမှ ပုလင်းများ မကွဲစေရန်နှင့်
ကျွန်တော်တပ်ထားသော မျက်မှန် အလစ်သုတ် မခံရစေရန်သာဖြစ်၏။
ရှပ်အင်္ကျီတွင်
အမြဲချိတ်ထားသော ဖောင်တိန်ကို သတိမထားမိ။ ရပ်နေသည့်နေရာက အဆင်းအတက် အပေါက်ဝနားတွင်။
မည်သို့ပင်ရှိစေ ခါးပိုက်နှိုက်ကိုတော့ ကျွန်တော် သတိထားသည်။ အထူးသဖြင့် ကျွန်တော်ကဲ့သို့
ခြေမလွတ် လက်မလွတ် ဖြစ်နေသူများသည် သူတို့၏သားကောင်
မဟုတ်လား။
ကျွန်တော်က လူတွေ၏
မျက်နှာအမူအရာကို အကဲခတ် ကောင်းပါသည်။ ထင်သည့်အတိုင်းပင် ကျွန်တော့်ထက် အသက်အနည်းငယ်
ကြီးပုံရသော ငနဲတစ်ကောင် ကျွန်တော့်နား ကပ်လာသည်။ ကျွန်တော်က မျက်မှန်ကို ဂရုစိုက်သည်။
သို့သော် သူက
အမှတ်မထင် ကျွန်တော့်ဖောင်တိန်ကို ဆတ်ခနဲ ဆွဲဖြုတ်ပြီး ကားပေါ်မှ ခုန်ချမည်ကြံသည်။ ကားကလည်း
မှတ်တိုင်နား နီးနေပြီမို့ အရှိန်လျှော့နေပြီ။ ကျွန်တော် စဉ်းစားကြည့်သည်။ အော်လိုက်လျှင်
သူ ကျွန်တော့်ကို
ရန်ပြုနိုင်သည်။
ထို့ကြောင့် ကျွန်တော်
အကောင်းဆုံးနည်းကို အသုံးချလိုက်သည်။ သူခုန်ချဆဲဆဲတွင် သူ့ဖင်ကို ကျွန်တော် ပိတ်ကန်ချလိုက်သည်။
ငနဲသားဒလိမ့်ခေါက်ကွေး ပြုတ်ကျသွားသည်။ ကားရပ်လိုက်ချိန်တွင် သူ မြေကြီးပေါ်မှ မထနိုင်သေး။
ကျွန်တော့် ဖောင်တိန်
ပြန်ရသည်။ သူ အဖမ်းခံရသည်။
....................................
....
ဒုတိယ နို့ညှာကောင်
မောင်ရူပ။
သည်တုန်းက ရှစ်တန်းမှာ။
တစ်နေ့ ကျောင်းကအပြန်
အိမ်ပေါ်တက်လာတော့ မျက်စိမျက်နှာမကောင်း ဖြစ်လာသည်ကို သတိထားမိသည်။ ထိုနေ့သည် သူ သုံးလပတ်
စာမေးပွဲ ပထမဆုံး ဖြေရသည့်နေ့ဖြစ်၏။ သူသည် ငယ်စဉ်က အလွန်ချူချာသူ၊ ရောဂါထူသူ ဖြစ်သည်။
ထို့ကြောင့် ဦးနှောက်ပိုင်းဆိုင်ရာ၌
အားနည်းနေသည်။ ဉာဏ်ထိုင်းသည်ဟု မဆိုနိုင်သော်လည်း ကျွန်တော်တို့ ညီအကို လေးယောက်ထဲတွင်တော့
ပညာရေးပိုင်း၌ နံပါတ် (၄) နေရာ၌ ရောက်နေရှာသည်။ ကျောင်းမှာတော့ သာမန် အဆင့်မျှ ရှိပါသည်။
သည်အတွက် အားငယ်တတ်ခြင်း
ကြောင့်ပေလော။ သို့တည်းမဟုတ် ပင်ကိုမူလ ( နို့ညှာ ) စရိုက်ကြောင့်ပေလောမသိ။ မောင်ရူပသည်
ကျွန်တော်တို့အားလုံးထဲတွင် သည်းညည်းအခံနိုင်ဆုံး၊ ခွင့်အလွှတ်နိုင်ဆုံး၊ အရိုးသားဆုံးလူတစ်ယောက်
ဖြစ်လာခဲ့သည်။
ဆိုပါစို့
... မည်သူ့ဘက်ကမှားမှား အကိုတွေ ငေါက်လျှင်၊ ညီဖြစ်သူကခံပက်လျှင် ဘာမျှပြန်မပြောဘဲ
မထေ့တထေ့ ပြုံးရွှင်၍သာ နေတတ်သည်။ သို့သော် ဘယ်သူမျှ မမြင်သော ကွယ်ရာကျမှ သူ့ခေါင်းကိုသူ
တိုင်နှင့် ဆောင့်ချင် ဆောင့်တတ်သည်။
စောစောက ပြောသလို
သုံးလပတ် စာမေးပွဲ ပထမနေ့ အိမ်အပြန် မျက်နှာမကောင်းသဖြင့် ကျွန်တော်က စာမေးပွဲ မဖြေနိုင်လို့ဘဲဟု
ပေါ့ပေါ့တွေးကာ ....
'' အဆင့် တစ်
နှစ် သုံး ထွက်မှ မဟုတ်ပါဘူးကွာ။ စာမေးပွဲ ဝင်ဖြေတယ် ဆိုတာကိုက လူတစ်ယောက်ရဲ့ သတ္တိနဲ့
စွမ်းရည်ပါပဲ '' ဟု အားပေးစကား ပြောရပါသည်။
သို့သော် သူက
ခေါင်းခါသည်။ ဒါဖြင့် ဘာဖြစ်လို့လဲဟု မေးသောအခါ
'' ဖောင်တိန်
ခါးပိုက်နှိုက် ခံရလို့ ကိုကို ''
'' ဟေ့ ... မင်း
မသိလိုက်ဘူးလား ''
'' သိလိုက်ပါတယ်
ကိုကို ''
'' ဟကောင်ရ၊ မင်း
အားကစားသမားတစ်ယောက် လုပ်နေပြီး ( သူသည်အားလုံးထဲတွင် အားကစား အလိုက်စားဆုံး၊ ကိုယ်လုံးကိုယ်ထည်
အတောင့်တင်းဆုံး ) ဆွဲတီးပစ်လိုက်ပါလား။ ဒါမှမဟုတ် အော်ချင်အော်၊ ဒရိုင်ဘာကို တိုးတိုးတိတ်တိတ်
အကြောင်းကြားပြီး ရဲစခန်း တန်းမောင်းခိုင်းပေါ့ ...''
သူ ဘာမျှမပြောဘဲ
တစ်စုံတစ်ရာကို လေးလေးနက်နက် စဉ်းစားနေသည်မှာ ကျွန်တော့်စိတ်အထင် တစ်မိနစ်ခန့် ကြာလိမ့်မည်။
ပြီးတော့မှ သက်ပြင်းရှည်ကြီးတစ်ချက် မှုတ်ထုတ်ပြီး အောက်ပါအတိုင်း ပြောပါသည်။
'' မဟုတ်ဘူး ကိုကို၊
ကျွန်တော်က တစ်ခုခု လုပ်လိုက်လို့ သူ့ကို လူမိသွားရင် ဝိုင်းတွယ်ကြမှာ။ ပြီးတော့ သူ့ခမျာ
လူကြားသူကြား ရှက်သွားမှာပေါ့ ''
.......................................................
............
ကျွန်တော့်အစ်ကို
မောင်ဝဏ္ဏသည် ဆယ်တန်းအောင်စဉ်က ဆေးတက္ကသိုလ်တက်နိုင်သည့် အမှတ်ကို မီသူ ဖြစ်သော်လည်း
သူသည် တက္ကသိုလ်တွင် လူကြိုက်နည်းသော ဘာသာဗေဒတစ်ခုဖြစ်သည့် ဒဿနိကဗေဒ ဘာသာရပ်ကို ယူခဲ့သည်။
သူသည် ငယ်စဉ်ကပင်
အလွန်စဉ်းစားသူ ဖြစ်၏။ စကားနည်းပြီး အချိန်အားရတိုင်း တွေးတောနေတတ်သည်။ ဆိုပါစို့
... ငယ်စဉ်က ကျွန်တော်တို့ တစ်တွေ စက်ဘီစီး၊ ဂေါ်လီရိုက်၊ ဂျင်ပေါက် စသည်ဖြင့် ကလေးတို့ဘာဝဆော့ကစားနေချိန်မျိုးတွင်
သူသည် အိမ်ကြမ်းပြင် လျှာထိုးမှ သဲများကို ကလော်ထုတ်လိုက်၊
လက်ဖြင့် ပြန်ဖိသွင်းထည့်လိုက် လုပ်နေတတ်သည်။ သည်လောက်ဆို သူ့ဗီဇကို သိလောက်ပါပြီ။
တစ်နေ့မှာ မှောင်ရီပျိုးစ
အချိန် ထုံးစံအတိုင်း အိမ်ပြန်လာသောအခါသူ့ ဘယ်ဘက် မျက်လုံးတစ်ဖက်ကို လက်ဖြင့်အုပ်လျှက်
အိပ်ခန်းတွင်းသို့ ခပ်သုတ်သုတ် ဝင်လာသည်။
ထိုစဉ်က ကျွန်တော်တို့အားလုံး
လူပျိုလူလွတ်ချည်း ဖြစ်သဖြင့် သူနှင့်ကျွန်တော်က တစ်ခန်းတည်း အတူအိပ်ပါသည်။ သူဝင်လာချိန်တွင်
ကျွန်တော် စာရေးနေပါသည်။ ခြေသံကြား၍ သူ့ကိုကြည့်လိုက်သောအခါ မျက်စိမျက်နှာ မကောင်းဘဲ
စောစောကပြောသလို မျက်စိတစ်ဖက် လက်ဝါးဖြင့် အုပ်ထားသည်ကို ချက်ချင်း သတိထားမိလိုက်သည်နှင့်
....
'' ကိုကို ဘာဖြစ်လာသလဲ
'' ဟု ပျာပျာသလဲ မေးရပါသည်။ ကျွန်တော်ထင်တာက သူသည် ပိန်ပိန်ညှောင်ညှောင် ခနိုးခနဲ့မို့
ဘတ်စ်ကား အဆင်းအတက်များလိမ့်ကျလာသလားလို့။
သူကတော့ ကျွန်တော့်ကို
ဘာမျှပြန်မပြောဘဲ သူ့ခုတင်ပေါ်တက်၊ မှောက်လျက်ကြီး လုပ်နေပါတော့သည်။ ကျွန်တော်က စိတ်ပူသဖြင့်
အတန်တန် မေးသော်လည်း တုတ်တုတ်မျှမလှုပ်။ နောက်ဆုံး အမေ့ကို
သွားပြော အကူအညီတောင်းမှ
သူ ဘတ်စ်ကားမှတ်တိုင်တွင် နောက်ပေါက်က ခိုစီးလာစဉ် အလစ်သမားက သူ့ဖောင်တိန်ကိုနှိုက်၍ဆင်းပြေးကြောင်း၊
သူကလည်း ဆင်းလိုက်ကြောင်း၊ ထိုငနဲကို မိသောအခါ ငနဲက သူ့ကို ဆွဲထိုးသွားကြောင်း သိရပါတော့သည်။
ကျွန်တော် ထောင်းကနဲဒေါသဖြစ်သွား၏။
သို့ဖြင့် ဖေဖေ့သားတပည့် အစ်ကိုသက်နောင် ( ယခု ဒါရိုက်တာသက်နောင် ) အား အကြောင်းကြားပြီး
တာမွေ ရဲစခန်းသို့ မော်တော်ဆိုင်ကယ်ဖြင့် ထွက်ခဲ့ကြတော့သည်။
ဖောင်တိန် အနှိုက်ခံရခြင်းထက်
ကျွန်တော့်အကို အထိုးခံရခြင်းကို ပို၍ ဒေါသဖြစ်သောကြောင့် ဖြစ်ပါသည်။
ဟိုရောက်တော့
အလျဉ်းသင့်ပင် စခန်းမှူးနှင့် အစ်ကိုသက်နောင်တို့မှာ သူငယ်ချင်းများ ဖြစ်နေကြသဖြင့်
ခါးပိုက်နှိုက် စာရင်းဝင်များကို ဖမ်းခိုင်းလေသည်။
ကျွန်တော့်အကိုထံမှ
နှိုက်သွားသော ငနဲကိုလည်း မိပါသည်။ သူကလည်း ဝန်ခံပါသည်။ သို့ရာတွင် ... ထိုငနဲ အစစ်ခံသည့်
စကားများကို ကြားရသောအခါ လက်ယားနေသော ကျွန်တော့်မှာ ငိုရမလို ရယ်ရမလို ဖြစ်ရပါတော့သည်။
'' ဗျာ ... အဲဒါ
ဒါရိုက်တာ မောင်ဝဏ္ဏဟုတ်လား။ ဒီလိုမှန်းသိရင် ကျွန်တော် နှိုက်တောင် နှိုက်ဖြစ်မှာ မဟုတ်ပါဘူးဗျာ။
ကျွန်တော် ရှိခိုးမိမှာပါ။ သူရိုက်တဲ့ ကတ္တီပါဖိနပ်စီး
ရွှေထီးဆောင်း ဇာတ်ကားဆိုရင် ကျွန်တော် သုံးခါပြန်တောင် ကြည့်ဖြစ်ပါတယ်။ ( ထိုစဉ်က ကိုကိုသည်
ထိုဇာတ်ကားဖြင့် အကယ်ဒမီပင် ရပြီးပါပြီ ) ခုဟာက ... ''
သူအတန်ငယ် ပြုံးတုံ့တုံ့လုပ်ပြီး
...
'' ကျွန်တော်
ကားပေါ်က ခုန်ဆင်းလိုက်တော့ သူက နောက်က ခုန်ဆင်းပြီး လိုက်လာတယ်။ ကျွန်တော်က ခပ်သုတ်သုတ်ကလေး
လျှောက်သွားတော့သူလည်း ကျွန်တော့်ကို အမီ လိုက်လာတယ်။ ဒါပေမယ့်
အော်လည်း မအော်ဘူးခင်ဗျ။
ကျွန်တော့်ကို မီလာတော့ ကျွန်တော့် ပခုံးကို ပုတ်တယ်။
ကျွန်တော်က ကျွန်တော့်ကို
ရန်မူမယ်ထင်လို့ အသင့်အနေအထားနဲ့ သူ့ဘက် လှည့်လိုက်တော့ သူက ( ညီလေး မင်းနဲ့ ငါ စကားနည်းနည်းပြောချင်တယ်ကွာ
) တဲ့။ ကျွန်တော်လည်း သူ့စကားကိုကြားတော့ ဘာ
လုပ်လို့ ဘာကိုင်ရမှန်း
မသိဘဲ ကြောင်သွားတာပေါ့။ ဒီမှာတွင် သူကဆက်ပြောတယ်။
( ညီလေးရာ လူတစ်ယောက်ရဲ့ဘဝကို
တည်ဆောက်တဲ့နေရာမှာ လုပ်နည်းလုပ်ဟန်တွေ အများကြီး ရှိပါတယ်။ တကယ်တော့ ဘဝဆိုတာ ...
) ဆိုလား၊ ဘာဆိုလား
ကျွန်တော်လည်း မမှတ်မိတော့ဘူး။ သူ့စကားတွေ ကျွန်တော် နားမလည်ဘူးခင်ဗျ။
ကျွန်တော်တို့
အလုပ်ဆိုတာကလည်း လူကြားသူကြား ကြာကြာနေလို့ မဖြစ်တဲ့အလုပ်။ ပြီးတော့ သူက ကျွန်တော့်ကို
အချိန်ဆွဲထားပြီး ဝိုင်းဖမ်းဖို့ လူလည်ကျတယ်ထင်ပြီး တစ်ချက်တည်း ဆွဲထိုးပြီး ပြေးတာပါပဲ။
သူ မှန်းသာသိရင် အဲဒီနေရာမှာတင် ကျွန်တော် ထိုင်ကန်တော့ပါတယ်ဗျာ။ ကျွန်တော် အလွန်ကြိုက်တဲ့
ဒါရိုက်တာပါ ''
စသဖြင့် ... အထက်ပါ
အဓိပ္ပာယ်ရသော စကားများကို ကဘောက်ချိကဘောက်ချာ ပြောရင်း စခန်းမှူးကို တောင်းပန်ပါသည်။
သို့ရာတွင် သူ့ကို အချုပ်ခန်းထဲ ထည့်လိုက်ကြပါ၏။ ပစ္စည်းလည်း ပြန်ရပါသည်။ ဘောလ်ပင်မျှသာပါ။
ကျွန်တော်၊ ဦးသက်နောင်နှင့်
စခန်းမှူးတို့ ရယ်မောကြရလေ၏။
အငယ်ဆုံးကောင်
မောင်ဉာဏ်ပေါ် ... ။
သူကတော့တစ်မျိုး။
ငယ်စဉ်ကတည်းက စကားကြွယ်သည်။ အားလုံးထဲတွင် ဉာဏ်အကောင်းဆုံး ဖြစ်သည်။ ပေကတ်ကတ် ဂျစ်ကန်ကန်
နေတတ်သည်။ မှားမှား မှန်မှန် သူမှန်တယ်ထင်ရာ ဇွတ်လုပ်သည်။ စည်းကမ်းကြီးသည်။ ကတ်သီးကတ်သတ်
လုပ်တတ်သည်။
ကတ်သီးကတ်သတ်ဆိုရာ၌
သူများတွေ အမှုမဲ့အမှတ်မဲ့ ထားတတ်သောကိစ္စမျိုးကို သူမြင်တတ်၊ လုပ်တတ်ခြင်း၌ကား ရှာမှရှားသော
လူတော်တစ်ယောက်ဖြစ်သည်။
ဥပမာ ... အလွန်အရေးကြီးသောပွဲလမ်းသဘင်မျိုးသို့
တက်ရောက်ခြင်း မရှိတတ်သော်လည်း ရပ်ကွက်ထဲမှ ပဲပြုတ်သည် အသုဘတွင် သွားရောက် ကူညီချင်
ကူညီနေတတ်သည်။ အစ်ကိုများကို ဖယ်ထား၊အဖေနှင့် အမေကိုပင်လျှင် သူ့စိတ်နှင့် မကိုက်လျှင်
ဝေဖန်ပြောဆိုတတ်သော်လည်း ဟော ... သူငယ်ချင်းများနှင့် ကျပြန်တော့ ဆွေးဆွေးနွေးနွေးတိုင်တိုင်ပင်ပင်
လုပ်နေတတ်ပြန်သည်။
ယခု သူ့၌ရှိနေသော
သမီးလေး၏ အမည်ပေးကိုပင်ကြည့်ဦး။ ' သူမ ' တဲ့။
ဘယ်သူမှ မစဉ်းစားမိသော
နာမည်။
ဘာပဲဖြစ်ဖြစ်
သူ၏အရည်အချင်းများ ( လူများစုနှင့် လိုက်လျောညီထွေတာရော မညီထွေတာရော ) ပေါင်းလိုက်တော့
သူ့တွင် အလွန်အရေးပါသော အရည်အချင်းတစ်ရပ် ပေါ်ပေါက်လာတော့သည်။
ဖြတ်ထိုးဉာဏ်
ကောင်းခြင်းနှင့် သတ္တိကောင်းခြင်းပင် ဖြစ်တော့၏။
ကိုင်း .... သင်း
ခါးပိုက်နှိုက်ခံရပုံကို ဆက်ပါတော့မည်။ သူ ရှစ်တန်းအောင်သောနှစ်က ကျွန်တော်သူ့ကို လက်ဆောင်တစ်ခု
ပေးခဲ့သည်။ ကျွန်တော် ရှစ်တန်းတုန်းက မြန်မာစာ စာစီစာကုံး ပြိုင်ပွဲတွင် ပထမဆု ရခဲ့သော
ပတ်ကား ၄၅ မိန်းမကိုင် ဖောင်တိန်ကလေး တစ်လက်။
တစ်နေ့ သူ ကျောင်းကအပြန်
ဘတ်စ်ကားပေါ်တွင် သူနှင့်ကပ်လျှက်ရွယ်တူငနဲတစ်ကောင်သည် ထိုဖောင်တိန်ကို သူ့အိတ်ကပ်ထဲမှ
ဆတ်ကနဲနှိုက်ယူလိုက်ပါသတဲ့။
သို့သော်
.... ဖောင်တိန်မှာ အရစ်ဖုံး မဟုတ်ဘဲ အစွပ်ဖုံး ဖြစ်သဖြင့် ဖောင်တိန်တစ်ချောင်းလုံး
ပါမသွားဘဲ အဖုံးချည်းသက်သက် ပါသွား၏။ အနှိုက်ခံရသည်ကို သူသိသလို ခါးပိုက်နှိုက်ငနဲမှာလည်း
ဖောင်တိန်အဖုံး
ချည်း သက်သက်သာ
ရလိုက်သဖြင့် ကိုးကန့်လန့်ကြီး ဖြစ်သွားရ၏။
ထိုအချိန်မှာပင်
ဖြတ်ထိုးဉာဏ်ကောင်းသော ဉာဏ်ပေါ် သည် ခါးပိုက်နှိုက်ငနဲကို အောက်ပါအတိုင်း တိုးတိတ်စွာ
ကပ်၍ ပြောလိုက်ပါသတဲ့။
'' ဒီမယ် ...
ဘော်ဒါအချင်းချင်းတွေပဲကွာ လုပ်ဖို့မကောင်းပါဘူး။ ဘေးလူတွေမသိခင် အသာလေးပြန်ပြီး ငါ့ဖောင်တိန်အဖုံးကို
ပြန်စွပ်ပေးလိုက်ပါ '' တဲ့။
ခါးပိုက်နှိုက်ငနဲလည်း
ရုတ်တရက် ကြောင်သွားပြီးမှ ဘေးဘီအခြေအနေကို ကြည့်ပြီး ဖောင်တိန်အဖုံးကို ဉာဏ်ပေါ်၏ အိတ်ကပ်ထဲ
ထောင်ထွက်နေသော ဖောင်တိန်ပင်မကိုယ်တွင် လှစ်ကနဲ ပြန်စွပ်ပေးရင်း ...
'' မင်းက ဘယ်အဖွဲ့ကလဲ
''
'' နှင်းဆီကုန်း
''
'' ငါက မိကျောင်းကန်
''
'' အေး လမ်းတွေ့ရင်
ခေါ်ပေါ့ကွာ။ အကူအညီလိုလည်း အချက်ပြလိုက်ပေါ့။ သိတယ်မဟုတ်လား ''
'' ကျွမ်းပါတယ်ကွာ
''
ဤသို့အားဖြင့်
ဉာဏ်ပေါ် အိမ်အပြန်တွင် သူ့ဇာတ်လမ်းကို ပြောပြရင်း ကျွန်တော်တို့ မိသားစု ပျော်ရွှင်ရယ်မောပါသည်။
ဇာတ်ပေါင်းသော်
ကျွန်တော်သည် ရုပ်ရှင်မင်းသား ဖြစ်လာ၏။ မောင်ရူပသည် လက်ဖက်ရည်ဆိုင် ဖွင့်သည်။ အစ်ကိုမောင်ဝဏ္ဏသည်
ရုပ်ရှင်ဒါရိုက်တာ ဖြစ်လာ၏။ ညီငယ်မောင်ဉာဏ်ပေါ် သည် စာရေးဆရာ
မင်းလူ ... ။
ကျွန်တော် ပြောချင်သည်ကို စာဖတ်သူ နားလည်ပါလိမ့်မည်။
မှတ်ချက်။ ။ အထက်ပါ
အကြောင်းအရာကို ကျွန်တော်၏ဖခင်ကြီးအား ပြောပြပြီး ...
'' ဖေဖေ ... ဖေဖေ
ကျွန်တော်တို့ အရွယ်လောက်တုန်းကရော အဲသလိုပဲ
ဖောင်တိန်ခါးပိုက်နှိုက် ခံရဖူးသလား ...
ဟင် '' ဟု မေးမိသည်။
ထိုအခါ ဖေဖေက
အောက်ပါအတိုင်း သက်ပြင်းရှည်ကြီး ချလျက် ပြန်ပြောပါသည်။
'' သားရယ် ခါးပိုက်နှိုက်ခံရဖို့
ဝေးလို့ ဖေဖေ သားတို့အရွယ်တုန်းက ကျောင်းတက်တာ ဖောင်တိန် မကိုင်နိုင်ဘူးသား။ ဖေဖေတို့
ခေတ်တုန်းက အပေါင်ဆုံးဆိုင်မှာ သွားဝယ်ရင် ဖောင်တိန်တစ်လက်ကို ငါးမတ်ပဲပေးရတယ်။ အသစ်ဆိုရင်
နှစ်ကျပ်ပေါ့ကွာ။ ဒါတောင် ဖေဖေ မဝယ်နိုင်ခဲ့ဘူး။
ဒီတော့ တစ်ချောင်း နှစ်ပြားတန် ကလောင်ကလေး တစ်ချောင်းဝယ်၊ ငါးပြားတန် မင်အိုးဝယ်၊ မင်းတို့လို
ကျောင်းစာတွေ ရေးခဲ့ရတယ် '' ဟု ဘယ်လိုအဓိပ္ပာယ်မှန်း ကျွန်တော် မသိနိုင်သော မျက်နှာထားဖြင့်ပြန်ပြောပါသည်။
( ကလျာ၊ စက်တင်ဘာ၊
၁၉၈၉ )
စာရေးဆရာ၊ ဒါရိုက်တာ မောင်ဝဏ္ဏ ဓာတ်ပုံကို wikimyanmarမှ ရယူသည်။
စာရေးဆရာ၊ ဒါရိုက်တာ မောင်ဝဏ္ဏ ဓာတ်ပုံကို wikimyanmarမှ ရယူသည်။
0 comments:
Post a Comment